Yn ôl Scope, nid yw parlys yr ymennydd (cerebral palsy) yn afiechyd nac yn salwch. Mae’n ddisgrifiad o ddiffyg corfforol sy’n effeithio ar symudiadau’r corff. Amrywia’r problemau symud o berson i berson, o fod yn broblem yr ydych prin yn sylwi arni i fod yn ddifrifol iawn. Nid oes unrhyw ddau berson sydd â pharlys yr ymennydd yr un fath; y mae mor unigolyddol â phobl eu hunain.
Mae “parlys yr ymennydd” yn cynnwys amrywiaeth o gyflyrau gwahanol. Mae’r tri phrif fath yn cyfateb i anafiadau i rannau gwahanol yr ymennydd:
Yn aml mae pobl sydd â pharlys yr ymennydd yn cael trafferth rheoli eu symudiadau a’u hwynebau. Nid yw hyn o reidrwydd yn golygu yr amharwyd ar eu gallu meddyliol mewn unrhyw fodd. Mae gan rai ddeallusrwydd sy’n uwch na’r cyffredin; mae gan eraill â’r parlys anawsterau dysgu canolig neu ddifrifol. Mae’r rhan fwyaf, fel y rhan fwyaf o bobl heb y cyflwr, yn berchen ar ddeallusrwydd normal.
Mae mwyfwy o gyflogwyr bellach â pholisïau sy’n annog amrywiaeth yn eu gweithlu, a bwriad y Ddeddf Gwahaniaethu ar sail Anabledd yw atal gwahaniaethu yn erbyn pobl oherwydd eu hanabledd. Y mae’n awr yn anghyfreithlon i drin rhywun sydd ag anabledd yn llai ffafriol na rhywun heb anabledd, ac mae’r Ddeddf yn ei gwneud hi’n angenrheidol ar gyflogwyr i sicrhau ‘addasiadau rhesymol’ i gael gwared ag unrhyw rwystrau y gallech chi ddod ar eu traws yn sgil eich anabledd.
Y cwestiwn sydd o’ch blaen chi wedyn yw pryd a sut i roi gwybod am eich salwch (nid oes raid i chi ddweud ond ni ellwch wedyn gael cefnogaeth y Ddeddf Anabledd). Mae mwy o gyngor yn yr adran Adnoddau, ond meddyliwch am oblygiadau posibl y cyflwr arnoch chi, a chanolbwyntiwch ar y pethau cadarnhaol. Gall cynghorydd yn y Gwasanaeth Gyrfaoedd eich helpu gyda hyn.
Os ydych yn hawlio budd-daliadau ar hyn o bryd, gall y Ganolfan Gynghori (Citizens Advice Bureau) eich helpu gydag amcangyfrifiad 'yn well eich byd' i gymharu eich sefyllfa ar hyn o bryd ag un posibl petaech mewn gwaith .
Bellach ceir mwyfwy o ffyrdd technolegol i ddatrys unrhyw rwystrau tybiedig i’ch dewis chi o yrfa. Gall y cynllun Mynediad i Waith roi arian ar gyfer addasiadau rhesymol i gyflogwyr, ac mae hyn yn cynnwys unrhyw newidiadau angenrheidiol ar gyfer cyfweliad a’r broses ddewis. Gall y cynllun Mynediad i Waith hefyd roi grantiau ar gyfer addasiadau corfforol i adeiladau i symud unrhyw rwystrau sydd yno i weithwyr sydd ond yn medru symud ychydig.
Yn hytrach na phortreadu eich anabledd fel problem, mae’n bwysig eich bod yn rhoi portread cadarnhaol. Os gellwch gyflwyno i’ch cyflogwr posibl ffyrdd o wneud addasiadau rhesymol i’w lle gwaith ar gyfer eich anghenion penodol chi, a ffordd o dalu am y newidiadau, bydd yn dangos iddynt eich bod yn berson gweithgar sy’n chwilio am atebion.
Rhoi nod tudalen gyda: