“Datblygais lawer o sgiliau yn ystod y lleoliad, ac rwy'n eu defnyddio o ddydd i ddydd ac yn parhau i'w gwella.”
Cwmni meddalwedd o Gaerdydd sy'n datblygu cymwysiadau gwe syml a diogel yw InPractice.org. Mae'n arbenigo mewn atebion gweinyddol, yn enwedig i adrannau sydd ar fwy nag un wefan.
Roedd InPractice ar fin lansio cymhwysiad busnes cenhedlaeth nesaf ac eisiau ei baratoi ar gyfer y farchnad. Roedden nhw'n edrych am unigolyn graddedig i brofi'r cynnyrch yn drylwyr cyn ei lansio.
Erbyn hyn, Ellis yw un o brif ddatblygwyr cynnyrch newydd y bydd InPractice.org yn ei lansio i BBaChau y gwanwyn nesaf, sef Woosabi. Heb Ellis a GO Wales, byddai Woosabi rai misoedd ar ei hôl hi yn lansio'i gynnyrch newydd!
Meddai Dan Bridge, y Rheolwr Gyfarwyddwr:
“Rydyn ni'n fusnes cymharol newydd ac, wrth i ni dyfu, rydyn ni am gynnal yr ystwythder hwnnw. Roedd angen i ni weld a fyddai'r ymgeisydd yn hapus i weithio yn ein hamgylchedd.”
“O ran deallusrwydd, y nod gydag Ellis oedd gweld a allen ni ei hyfforddi fel rhaglennydd meddalwedd er nad oedd ganddo unrhyw brofiad blaenorol, gan ei fod newydd raddio gyda gradd mewn ffiseg. Felly, roedd yn mynd i fod yn dipyn o her o reidrwydd ond roedd y lleoliad yn gyfle gwych i InPractice.org ac Ellis weld a oedd hi'n bosibl. Roedd Ellis yn wych a phenderfynwyd ei gyflogi'n syth; mae popeth yn bosibl!”
“Rwy'n credu bod InPractice.org ac Ellis wedi elwa'n fawr ar y lleoliad o ran twf. Mae InPractice.org yn sicr wedi elwa ar gynllun GO Wales gan ei fod yn darparu'r cymorth i ddod o hyd i aelodau staff newydd fel Ellis a'u mentora.”
Roedd Ellis yn falch iawn o fod yn rhan o'r broses o ddatblygu'r cynnyrch newydd ac mae wedi cael cynnig swydd lawn amser gyda'r cwmni.
“Roeddwn i'n ffodus iawn i gael cynnig swydd lawn amser fel rhaglennydd meddalwedd gydag InPractice.org. Ar hyn o bryd, rydw i wrthi'n datblygu rhaglen o'r enw Woosabi, sef offeryn a fydd yn helpu busnesau i reoli eu cwsmeriaid a'u cyllid. Mae'n gyffrous iawn ac rwy'n falch o fod yn rhan o rywbeth mor fawr.”
“Datblygais lawer o sgiliau yn ystod y lleoliad, ac rwy'n eu defnyddio o ddydd i ddydd ac yn parhau i'w gwella. Rydw i hefyd yn dod yn fwyfwy cyfarwydd ag ieithoedd rhaglennu fel PHP a Javascript.”
“Byddem yn argymell cynllun GO Wales i fyfyrwyr a graddedigion. Rwy'n credu ei bod hi'n ffordd wych o gael "blas" ar swydd y mae gennych chi ddiddordeb ynddi. Dwi'n difaru dim!”
