Yn ôl Mind, bydd un ym mhob pedwar o bobl yn dioddef o broblem iechyd meddwl ar ryw adeg yn eu bywydau. Mewn rhai achosion, cyflwr dros dro sydd dan sylw a fydd yn gwella’n gyfan gwbl. Bydd pobl eraill yn dysgu rheoli eu cyflwr ond mae’n aros gyda nhw.
Ceir llawer iawn o wahanol fathau o ofid meddwl y bydd pobl yn eu profi. Ni fydd yn effeithio ar ddau unigolyn yn yr un ffordd. Y problemau mwyaf cyffredin yw iselder, pryder, pyliau panig, anhwylder obsesiynol-cymhellol, ffobiau, iselder gorffwyll a sgitsoffrenia. Gellir cael hyd i fanylion am gyflyrau penodol ar wefan Mind.
Mae gan nifer gynyddol o gyflogwyr bolisïau sy’n annog amrywiaeth yn y gweithlu a nod y Ddeddf Gwahaniaethu Ar Sail Anabledd yw atal gwahaniaethu yn erbyn pobl oherwydd eu hanabledd. Erbyn hyn, mae’n anghyfreithiol i drin rhywun sydd ag anabledd yn llai ffafriol na rywun sydd heb anabledd ac mae’r Ddeddf yn gosod gofynion ar gyflogwyr i wneud ‘addasiadau rhesymol’ i symud unrhyw rwystrau y gallech ddod ar eu traws oherwydd eich anabledd.
Mae hyn yn gadael y cwestiwn i chi pryd a sut i fynd ati i ddatgelu’ch anabledd (does dim rhaid i chi ei ddatgelu ond os na fyddwch , fedrwch chi ddim hawlio cael eich gwarchod gan y Ddeddf). Mae mwy o gyngor am ddatgelu yn yr adran Adnoddau, ond meddyliwch am oblygiadau posibl eich cyflwr i chi, a chanolbwyntiwch ar y pethau cadarnhaol. Gall ymgynghorydd gyrfaoedd eich helpu â hyn.
Mae’r Ddeddf Gwahaniaethu Ar Sail Anabledd (2005) yn rhoi mwy o bwyslais ar broblemau iechyd meddwl. Mae’r ychwanegiadau diweddar at y Ddeddf wedi symud yr angen i salwch meddwl fod yn ‘adnabyddus yn glinigol”. Mae hyn yn ehangu’n sylweddol gwmpas yr hyn yw anhawster iechyd meddwl.
Os byddwch yn cael bod y salwch yn golygu na fedrwch ddilyn eich nod gyrfa gwreiddiol, meddyliwch yn ochrol am beth rydych yn ei fwynhau a sut y gall hynny’ch arwain at ryw ffurf ar gyflogaeth. Bydd rhai pobl yn dewis bod yn hunangyflogedig oherwydd eu bod yn gweld y gall hyn roi’r grym iddynt reoli’u llwyth gwaith eu hunain.
Mae nifer gynyddol o atebion technolegol i unrhyw rwystrau canfyddedig i’ch dewis gyrfa.
Gall y cynllun Mynediad at Waith hefyd ddarparu cyllid ar gyfer addasiadau rhesymol i gyflogwyr ac mae hyn yn cynnwys unrhyw addasiadau sydd eu hangen mewn perthynas â’r drefn gyfweld a dethol.
Yn hytrach na phortreadu’ch anabledd fel problem, mae’n bwysig portreadu’r agweddau cadarnhaol. Os gellwch sôn wrth ddarpar-gyflogwr am ffyrdd o wneud addasiadau rhesymol i’w gweithle ar gyfer eich anghenion penodol, a ffordd o dalu amdanynt, bydd hyn yn dangos eich bod yn broactif ac yn rhywun sy’n ceisio chwilio am atebion.
Rhoi nod tudalen gyda: