Roedd ymgysylltiad y myfyriwr â chymorth yn ddwys, o ystyried y rhwystrau lluosog yr oeddent yn eu hwynebu, ac fe ymdriniodd yr ymgynghorydd â sawl maes o ran datblygu sgiliau, gan gynnwys: cymorth i ymgeisio am swyddi a lleoliadau; tiwtorialau ar blatfformau rhwydweithio proffesiynol; datblygu CV; datgelu grymusol; ac adnabod a gwella sgiliau presennol. Fe wnaeth y myfyriwr hefyd fynychu gweithdai niferus a gynhaliwyd ar y cyd gan y tîm Cymorth i Baratoi am Yrfa ac Ymgynghorwyr Gyrfaoedd. Hefyd, fe drefnodd yr ymgynghorydd sesiwn blas ar waith grŵp gyda thîm Gwasanaethau Llyfrgell a Gwybodaeth y brifysgol. Darparodd y myfyriwr adborth cadarnhaol am y cyfle, gan gadarnhau ei fod wedi goleuo’u hystyriaeth o ran llwybrau gyrfa yn y dyfodol. Ar ben hynny, roedd y tîm Cymorth i Baratoi am Yrfa wedi darparu fforwm i’r myfyriwr ymgysylltu â chyd-fyfyrwyr eraill â diddordebau a nodau gyrfaol tebyg.

Rhoddodd y tîm flaenoriaeth i ganfod lleoliad â thâl ar gyfer y myfyriwr, ac yn dilyn cymorth helaeth gyda’r broses ymgeisio, llwyddodd y myfyriwr i gael lleoliad haf amser-llawn â thâl am bedair wythnos gyda thîm Hygyrchedd a Chynhwysiant y brifysgol fel Cynorthwyydd Prosiectau Haf y Gwasanaethau Myfyrwyr trwy gynllun cystadleuol ABERymlaen. Eto, darparodd y myfyriwr adborth cadarnhaol a oedd yn amlygu cyfraniad yr adran i gefnogi myfyrwyr â rhwystrau ychwanegol ac a oedd yn cydnabod y sgiliau, yr hyder a’r rhwydweithiau yr oeddent wedi’u datblygu yn ystod y lleoliad. Ers cwblhau’r lleoliad, mae’r myfyriwr wedi cyflwyno cais am rôl barhaol fel Tiwtor Sgiliau Astudio yn y tîm Hygyrchedd a Chynhwysiant

Gyda help y Rhaglen Cymorth i Baratoi am Yrfa datblygodd y myfyriwr hyder i ymgymryd â chyflogaeth:

"Roedd y gwaith a wnaeth y myfyriwr dros bedair wythnos eu lleoliad yn amhrisiadwy. Fe wnaethant waith ymchwil ac ailwampio a golygu cyflwyniadau PowerPoint ar gyfer digwyddiadau, taflenni gwybodaeth a chreu canllawiau gweledol newydd sbon i roi cymorth i ymgyfarwyddo â’r campws a llety. Fe wnaethant ymdoddi’n rhwydd i’r tîm, gofyn cwestiynau ac roedd ganddynt lawer o allu i weithio’n annibynnol. Crëwyd argraff ar ein Pennaeth Adran gan elfennau o’u gwaith y mae ef yn credu y gellid eu cyflwyno i’r holl fyfyrwyr newydd.”

Yn dilyn trafodaeth 1-i-1, fe greodd yr ymgynghorydd gynllun gweithredu ar gyfer y myfyriwr, a oedd yn nodi’r cymorth a oedd ar gael gan y gwasanaeth cyflogadwyedd. Roedd hyn yn cynnwys ymgyfarwyddo ag adnoddau presennol, datblygu CV ac opsiynau profiad gwaith. Roedd y myfyriwr yn pryderu nad oedd ganddo’r profiad ymarferol a’r cymwysterau yr oedd eu hangen i sicrhau profiad gwaith neu gyflogaeth arbenigol yn y sector. Gyda’i gilydd, adnabu’r myfyriwr a’r ymgynghorydd mai cymhwyster llif gadwyn oedd yr opsiwn gorau i helpu i wella ei sgiliau arbenigol a gwella ei gyflogadwyedd.

Fe drefnodd y tîm le i’r myfyriwr ar gwrs argymelledig gyda Phil Dunford Chainsaw Training, a gynhaliwyd yn lleol i gyfeiriad cartref y myfyriwr. Fe wnaeth y tîm ddileu’r rhwystrau ariannol ar gyfer y myfyriwr trwy gyllido cost y cymhwyster a gwneud taliad uniongyrchol i ddarparwr y cwrs.

Ers gwneud y cwrs, mae’r myfyriwr wedi llwyddo i sicrhau gwaith yn y diwydiant coedwigaeth yn ei leoliad yn ystod y tymor a’i leoliad cartref. Fe wnaeth y cwrs ei gyflwyno i gysylltiadau yn y diwydiant hefyd ac mae wedi ailgynnau ei frwdfrydedd dros ei gwrs gradd.

“Roeddwn i’n teimlo wedi fy natgysylltu oddi wrth fy maes astudio. A minnau wedi ennill y cymhwyster ychwanegol hwn yn fy niwydiant rwy’n teimlo’n gryfach fy nghymhelliant nag erioed i ragori yn fy astudiaethau academaidd”.

Lis Owen, Rheolwr Cymorth Profiad Gwaith, sy’n egluro’r gwahaniaeth y mae’r bwrsariaethau’n ei wneud i fywydau myfyrwyr: “Roedd hi’n wych gallu cynnig y cyfle hwn i’r myfyriwr. Mae’n dangos yr effaith sylweddol y mae’r cymorth hwn trwy’r fwrsariaeth wedi’i chael ar ei hunan-fri, ei gymhelliant a’i gyfleoedd cyflogaeth. Mae’r hyfforddiant wedi agor drysau i waith cyflogedig a’r profiad gwaith mwy arbenigol yr oedd yn chwilio amdano.”

I gyrraedd ei nod, sef cael profiad ysgrifennu proffesiynol, fe lwyddodd y Swyddog Prosiect o’r tîm Hyder o ran Gyrfa i sicrhau lleoliad â thâl i Katherine gyda Promo Cymru i ysgrifennu cynnwys ar gyfer ei wefan blogio, “The Sprout”. Cyn i’r lleoliad ddechrau fe drefnodd y tîm fod Katherine yn cwrdd â Promo Cymru i drafod gofynion y rôl a chadarnhau disgwyliadau’r ddau barti. Fe wnaeth hyn alluogi Katherine i nodi ei hamcanion ar gyfer y lleoliad gwaith ac roedd yn gyfle i ddatgelu ei chyfrifoldebau gofalu a’i hanabledd, a chytuno ar unrhyw addasiadau rhesymol y gallai fod eu hangen, a oedd yn cynnwys oriau gwaith hyblyg a gweithio gartref.

Wrth i’r lleoliad ddechrau fe gysylltodd y Swyddog Prosiect Hyder o ran Gyrfa â myfyriwr GO Wales blaenorol a oedd yn cael ei gyflogi’n llawn-amser yn Promo Cymru, i weithio gyda Katherine yn ystod ei lleoliad, gan wasanaethu fel mentor iddi.

“Roedd Katherine yn hyderus ac yn gyfforddus yn siarad gyda’r tîm, gan gyflwyno ei syniadau mewn modd eglur ac effeithiol. Daeth â syniadau gwreiddiol i’r tîm, roedd hi’n broffesiynol ac yn hyderus o ran ei hagwedd at waith ac fe gynhyrchodd gynnwys da. Byddem yn hapus i’w chroesawu’n ôl yn y dyfodol” Andrew Collins, Ymgynghorydd Cyfathrebu Digidol, Promo Cymru.

Cafodd Katherine ei hannog i fynychu cyfleoedd rhwydweithio niferus a oedd yn cynnwys digwyddiad cyhoeddi dan arweiniad cyflogwyr a digwyddiad “Grŵp Blaenoriaeth” yn ystod amser cinio a drefnwyd gan y brifysgol. Fe helpodd y rhain i gynyddu ei gwybodaeth am y diwydiant a’r broses recriwtio yn ogystal â rhoi’r cyfle i Katherine ymgysylltu â myfyrwyr o gefndir tebyg iddi hi.

Tuag at ddiwedd ei lleoliad, roedd gwelliant amlwg yn hyder Katherine a’i hawydd i roi cynnig ar bethau newydd, felly fe wnaeth y Swyddog Prosiect ei hannog i roi cyflwyniad mewn digwyddiad Hyder o ran Gyrfa i fyfyrwyr anabl i rannu ei phrofiad. Rhoddodd Katherine gyflwyniad llwyddiannus yn y digwyddiad, sy’n dangos effaith y cymorth a gafodd ar ddatblygiad ei hyder a sgiliau cyflogadwyedd.

"Byddwn i’n argymell y rhaglen yn fawr i unrhyw un, yn enwedig y rhai sydd yn eu blwyddyn olaf ac yn poeni am adael y brifysgol heb unrhyw brofiad. Fe lwyddais i ymgodymu â gwaith ac astudio heb i hynny effeithio’n ormodol ar fy ngraddau ac mae wedi rhoi mwy i mi nag y gallai astudio yn unig ei wneud”.

Yn wreiddiol, dechreuodd y tîm trwy helpu Naajib i adnabod y profiad a’r sgiliau yr oedd eisoes wedi’u cael, a sut y gallai’r rhain gael eu teilwra a’u cymhwyso i wahanol amgylcheddau gwaith. Bu’r ymgynghorydd yn ei goetsio gan roi cymorth mewn sawl maes, gan gynnwys ymchwil fanwl i opsiynau gyrfa posibl a oedd yn gysylltiedig â chwaraeon, datblygu CV, rhwydweithio â’r diwydiant a defnyddio’r cyfryngau cymdeithasol.

O ystyried bod profiad gwaith yn flaenoriaeth benodol i Naajib, fe ganolbwyntiodd yr Hyfforddwr Gyrfaoedd ar sicrhau cyfleoedd yn y meysydd a oedd o ddiddordeb arbennig i Naajib, sef chwaraeon elitaidd ac iechyd y cyhoedd. Fe wnaethant adnabod yr elusen leol ‘Elderfit’, a oedd yn darparu dosbarthiadau ymarfer corff wedi’u teilwra i bobl oedrannus, fel opsiwn addas. Fe wnaeth yr ymgynghorydd gynorthwyo Naajib gyda’r cais, ac wedi iddo lwyddo i sicrhau’r swydd, dechreuodd gysgodi’r dosbarthiadau ymarfer corff, gan fynd ymlaen wedyn i ddarparu sesiynau cynhesu’n annibynnol.

“Mae Naajib wedi bod yn gwirfoddoli gyda ni am y flwyddyn ddiwethaf ac mae wedi bod o fudd enfawr i ni fel sefydliad, gan ymgysylltu â’n cyfranogwyr, a chynnig cyngor ychwanegol ynghylch materion cryfder a chyflyru mwy penodol. Mae wedi bod yn fraint ei gael yn bresennol.”

Gan ddefnyddio’r sgiliau chwilio am swyddi yr oedd newydd eu hennill, adnabu Naajib leoliad cryfder, cyflyru, adsefydlu a thylino gyda Rygbi’r Dreigiau. Treuliodd y tîm Ehangu Llwyddiant amser yn cynghori ac yn cynorthwyo Naajib gyda’r cais yn ogystal ag ymarfer ar gyfer y cyfweliad. Yn dilyn proses gystadleuol, llwyddodd Naajib i sicrhau un o ddim ond dau le.

Gyda chymorth y tîm Ehangu Llwyddiant, mae gan Naajib hyder newydd mewn cymhwyso’i sgiliau a chysylltu â’r diwydiant chwaraeon: “Fe helpodd y cyfarfodydd hyn fi i gael profiad gwaith yn Elderfit a sicrhau lleoliad gydag Academi Dreigiau Casnewydd. Rwy’n teimlo’n llawer mwy clir yn awr o ran cyfeiriadau fy ngyrfa a sut i gyrraedd yno. Byddai’r cyfarfodydd hyn yn berffaith i unrhyw un. Byddwn yn eu hargymell yn fawr”.

Fe wnaeth sgyrsiau cychwynnol gydag Ymgynghorydd Cyflogadwyedd y Brifysgol Agored yng Nghymru helpu Emily i adnabod ei hanghenion o ran cymorth, ac adnabod ei chryfderau a sgiliau trosglwyddadwy y gallai eu dwyn i’r gweithle. Trwy gyfres o drafodaethau, fe wnaeth yr Ymgynghorydd ac Emily ganolbwyntio eu hamcanion ar gael mwy o ddealltwriaeth am y diwydiant datblygu rhyngwladol a mwy o brofiad ohono, yn ogystal â mewnwelediad pellach i opsiynau gyrfa y gallai fod ar Emily eisiau eu dilyn. Fe geisiodd wella ei hunanhyder, ei hannibyniaeth a’i sgiliau rheoli amser hefyd.

Er gwaethaf ofn Emily y byddai byw mewn ardal wledig yn rhwystr i ddod o hyd i gyfleoedd profiad gwaith mewn sector arbenigol, fe wnaeth yr Ymgynghorydd Cyflogadwyedd sicrhau lleoliad gyda Chanolfan Materion Rhyngwladol Cymru (WCIA) yng Nghaerdydd. Fe wnaeth tîm GO Wales: Cyflogadwyedd Myfyrwyr dalu costau teithio a chynhaliaeth Emily, fel bod y profiad gwaith yn fforddiadwy. Darparodd y lleoliad gyfleoedd rhwydweithio a phrofiad amhrisiadwy yn y diwydiant, a phenllanw hynny oedd bod Emily wedi ysgrifennu adroddiadau ac erthyglau a oedd yn ymwneud â digwyddiadau a materion datblygu rhyngwladol.

Yn ogystal â’r profiad gwaith, fe fynychodd Emily nifer o ddigwyddiadau a gweithdai cyflogadwyedd dan arweiniad y Gwasanaeth Gyrfaoedd a Chyflogadwyedd. Roedd y rhain yn cynnwys sesiynau a oedd yn canolbwyntio ar strategaethau chwilio am swyddi a darganfod a chyrraedd eich nodau, a wnaeth ei helpu i sicrhau swydd ran-amser gyda sefydliad profiadau awyr agored gan roi cymorth marchnata. Daeth ei thaith gyda GO Wales i ben pan roddodd Emily gyflwyniad i Fwrdd Prosiect y Brifysgol Agored yng Nghymru i rannu ei phrofiadau o gyfranogi yn y rhaglen. Rhoddodd y Brifysgol Agored yng Nghymru ystyriaeth i’r adborth yma wrth gynllunio darpariaeth yn y dyfodol.

Ar ôl graddio, derbyniodd Emily swydd barhaol gyda’r sefydliad profiad gwaith awyr agored, gan weithio 30 awr yr wythnos. Parhaodd i ymgysylltu â gwasanaeth gyrfaoedd prif ffrwd y Brifysgol Agored yng Nghymru i ddal i adeiladu ar ei llwyddiant, ehangu’r rhwydweithiau yr oedd wedi’u sefydlu, a symud ar hyd ei llwybr gyrfa yn y dyfodol.

“Mae’r rhaglen cyflogadwyedd newydd wedi bod yn adnodd amhrisiadwy i mi! Nid yn unig y mae wedi fy helpu i adnabod ble mae fy nghryfderau a pha feysydd y gallaf wella arnynt, ond mae hefyd wedi fy helpu i sicrhau interniaeth gyffrous. Mae Ros wedi bod yn allweddol ac yn anhygoel o gefnogol yn y broses honno, ac rwy’n ddiolchgar iawn am yr help y mae wedi’i roi i mi. Byddwn yn sicr yn argymell y rhaglen cyflogadwyedd wrth unrhyw un sy’n amcanu at hunanwella neu ddechrau/newid gyrfa”. Emily, Myfyrwraig y Brifysgol Agored yng Nghymru.

Fe wnaeth y tîm Hwb Gyrfaoedd adnabod nifer o feysydd ar gyfer datblygu, a oedd yn cynnwys cyfleoedd ar gyfer rhwydweithio proffesiynol, mentora a chyngor ynghylch dechrau busnes i ymdrin â diffyg hyder a chymhelliant y myfyriwr wrth iddynt nesáu at ddiwedd eu blwyddyn astudio gyntaf. Roeddent hefyd yn teimlo wedi dadrithio ac yn amharod ar gyfer realiti rhedeg busnes

Chwiliodd y tîm Hwb Gyrfaoedd am fusnesau osteopatheg lleol y gallai’r myfyriwr greu cysylltiadau proffesiynol drwyddynt i’w helpu i wella eu hyder a chanolbwyntio ar gyfeiriad eu gyrfa. Cytunodd perchennog clinig Osteopatheg lleol i weithredu fel mentor ac fe gynigiodd gyfle cysgodi gwaith i’r myfyriwr, a fyddai’n eu galluogi i arsylwi ar fwy o amrywiaeth o achosion cleifion a chynlluniau triniaeth y tu hwnt i amgylchedd y brifysgol.

Fe wnaeth y tîm annog y myfyriwr i fod yn bresennol mewn sgwrs cyflogadwyedd dan arweiniad y brifysgol ar ‘Wireddu Eich Potensial’ ac fe’u cyfeiriodd at y Cwrs Datblygu Gyrfa a oedd yn canolbwyntio ar wahanol elfennau cyflogaeth gan gynnwys paratoi cynllun gweithredu ar gyfer gyrfa, datblygu CV a dechrau busnes. Hefyd, derbyniwyd y myfyriwr ar ddigwyddiad hyfforddi’r tîm menter ‘Hybu Eich Syniad’ lle gwnaethant werthu eu syniad busnes a manylion eu hachos busnes yn llwyddiannus i’r grŵp, gan arwain at gael cynnig cyllid dechrau busnes.

Cadarnhaodd adborth y myfyriwr yn yr apwyntiad dilynol fod y myfyriwr yn teimlo’n gryfach eu cymhelliant ac yn fwy hyderus, a bod ganddynt weledigaeth eglur ar gyfer eu dyfodol. Roedd cysgodi gwaith wedi darparu mewnwelediadau gwerthfawr a realistig i’r sgiliau a’r ymdrech sy’n ofynnol i sefydlu a chynnal busnes osteopatheg, ac roedd ymgysylltu â Hwb Gyrfaoedd wedi helpu i ddatblygu rhwydweithiau allanol gydag osteopathiaid ledled y rhanbarth, a ddarparodd sylfaen ardderchog yn barod ar gyfer graddio. Mae cymorth y tîm, trwy arweiniad strwythuredig a bod yn gefn iddynt, wedi eu helpu i symud ar hyd y llwybr tuag at sefydlu busnes newydd.